إحنا كمصريين عندنا الاتنين.. آه والله:  "الجروب ثينك" و "التعصب"

ياختي كده ينفع وكده ينفع

الحقيقة إني أول مرة اكتب على المدونة بتاعتي وأول مرة اكتب على الاطلاق، كان فيه محاولات كتير قبل كده بس كلها تندرج تحت بند الخواطر مش أكتر وبالرغم من ده قلت لازم أجرب اكتب عن حاجة مش أنا بس اللي واخد بالي منها، حاجتين عكس بعض تماماً في المجنمع المصري وظاهرين بوضوح صارح خصوصا في الكام سنة اللي فاتوا.

إلا هو إيه الجروب ثينك ده، هو إن مجموعة من الناس بتفكر بنفس الطريقة وبتبص للحاجات والأفكار من نفس الزاوية واللي يفكر أو يحاول يفكر بشكل مختلف يعتبر خارج عن المنظومة.. والمشكلة إن الجروب الثينك في المجتمع المصري غالب عليه أوي المظهرية والفشخرة الكدابة بدون تفكير حقيقي.. طب تحبوا اديكو مثال بسيط، ظاهرة المدارس الانترناشونال اللي معظم الناس من طبقات معينة بتدخل عيالها فيها، لحد هنا وعادي إنما تلاقي الناس literally بتسف تراب عشان يدخلوا عيالهم المدارس عشان يقعدوا يتفشخروا قدام بعض في النادي، مع العلم ان تعليم أجيال كتير أوي حتى من شباب اليومين دول تعليم حيالله national وزي الفل وربنا.

بقينا كلنا فجأة عاوزين نسكن في كومباوندز سواءاً في القطامية أو زايد والناس الياي بس يا جماعة هما اللي ساكنين برة الكمباوندز وطبعاً الصيف ييجي وتلاقي كل زمايلك في الشغل بيسألوك "إيه مش طالع الساحل الويك إند ده" ولو قلت لأ اللي قدامك يحسسك انك جاي من مجرة الدب القطبي.

بس الحقيقة إن المفروض إن الجروب ثينك دليل على الوحدة وتجانس المجتمع، ده المفروض يعني.. خد عندك من بعد ثورة يناير 2011 وفيه حاجة ضربت في وشنا كلنا، على فكرة المصريين زي ما هما بيروحوا نفس الأماكن وبيتفشخروا بنفس الحاجات مفيش قلق، لكن الآراء والجدال في السياسة والدين والمواضيع السخنة حدث ولا حرج يا ريس، كل واحد بيدافع عن وجهة نظره وأراؤه ويتخانق مع صحابه وأهله، انا بجد شفت صحاب اتقطاعوا في الكام سنة اللي فاتوا، هما بيروحوا نفس الأماكن وبيسافروا الساحل وبيتمنظروا بالسينيهات وناقص ياخدوا selfies وهما نايمين كده group think عسل وعال العال بس نتفق في السياسة أو في موضوعات تتعلق بالمجتمع كمنظومة فشر وإحنا وش كده برضك ده احنا نقطع في شواشي بعض ونتخانق ونهلل واللي يستجري يرد وقعة اللي جابوه بمبي مسخسخ..

الحقيقة هو ممكن يبقى عادي إن فيه group think  ، بس اللي مش عادي خالص أن الجروب ثينك يبقى كمان معاه تعصب وعنصرية في الرأي..